Oǵan qatysqan oblystyq sottyń tóraǵasy Erlan Aıtjanov tergeý sýdıasynyń jumysyn jandandyrý talaptary Bes ınstıtýsıonaldyq reformany júzege asyrý jónindegi Ult josparynyń 22-qadamynda atap kórsetilgenin jetkizdi. Ol óz sózinde adamnyń jáne azamattardyń konstıtýsııalyq quqyǵyn shekteıtin barlyq tergeý qyzmeti jónindegi ókilettilikti tergeý sýdıasyna birtindep berýdi qamtamasyz etý arqyly sotta aıyptalýshy jáne qorǵaýshy arasyndaǵy teńgerimdi qamtamasyz etý maqsaty qoıylǵanyn, bıyl elimizdiń barlyq aımaqtarynda mamandandyrylǵan tergeý sottaryn qurý týraly Prezıdent Jarlyǵy shyqqanyn, órkenıetti elderi tájirıbesi barlyq satydaǵy sot júıesine engiziletinin atap kórsetti.
Alǵashqy kezde tergeý sýdıasyna qarap-tekserý, tintý, aıǵaq zat alý ókilettigi ǵana berilse, búginde onyń quzyretine kúzetpen ustaý, qamaýǵa alý, onyń merzimin uzartý, laýazymynan ýaqytsha shettetý, múlikke tyıym salý sııaqty ókilettikter kiredi. Qylmystyq is júrgizýdiń sotqa deıingi satylaryna sot qadaǵalaýynyń enýi, birinshiden, qaralyp jatqan isterdiń ashyqtyǵyn ańǵartsa, ekinshiden, azamattardyń quqyqtary men bostandyqtaryn qorǵaýǵa kepildik beredi. Buǵan deıin isterdi prokýrorlar qarap, jeke-dara sheshim qabyldap kelgen bolatyn.
«Tergeý sotyna kelip túsken materıaldy sýdıa 8 saǵattyń ishinde ashyq sot otyrysynda qaraýǵa mindetti. Otyrysqa barlyq taraptar, atap aıtqanda, prokýror men qorǵaýshy, kúdikti men jábirlenýshi de shaqyrylady. Osylaısha, sýdıa olardyń aldynda sheshimdi jarııa túrde qabyldaıdy», deıdi oblystyq sottyń qylmystyq ister jónindegi sot alqasynyń tóraǵasy Vladımır Kırılenko.
Mamandandyrylǵan tergeý sotynyń tóraǵasy qyzmetin Dáýren Qaıratuly atqarady.
О́mir ESQALI,
«Egemen Qazaqstan»
Soltústik Qazaqstan
